حق لها ولنا ولكل من يرغب …

Posted: 17/03/2011 in أزمات اجتماعية, سوريا
الوسوم:,

بلشت المدونة ديما حملة ..بعتقد على بساطة المطلب إلا إنو بيحتوي تلات اشكاليات معقدة بنعاني منها

الأولى إلا علاقة بحق المرأة كالرجل في أن تمنح جنسيتها لأولادها بغض النظر عن الملابسات الأخرى وهي مشكلة قانونية تتجلى في أن القانون يشرعن للفروقات بين الرجل والمرأة من حيث قدرة الأولى على منح الجنسية وحرمان المرأة من هذه الخاصية وكأننا نتحدث عن مواطن سوري درجة أولى ومواطنة سورية ما بعرف شو وضعا وما بعرف إذا في حدا بيعرف بس ما حدا يقلي ” مساواة ” لإنو المساواة لازم تكون حتى بحق منح الجنسية …ومن هالباب فأنا مو متضامن لإنو كلمة متضامن مقرفة أنا بدم واحد وقضية وحدة مع حق المرأة السورية بمنح جنسيتها لأطفالها ..وضد القانون اللي بيشرعن لطرف حقو وبيحرم الطرف الأخر من هالحق
الإشكالية التانية اجتماعية من حيث موقف الناس من هالقضية ..طيب ببساطة في نسبة منيحة من السوريات متزوجين من غير السوريين  ولأكتر من سبب منها وفاة الزوج أو الطلاق مثلاً أو حتى رغبة شخصية بإنو ترجع المرأة السورية ع بلدا هيي و ولادها …وما رح نحكي شو رح بتعاني بداية من أزمة التعايش مع المجتمع بولاد من المستحيل يتوظفوا بجهاز الدولة بسوريا لإنو وبعد عشرين سنة ع حياتهن بسوريا رح يعرفوا إنهن مانهن سوريين وما رح بيصيروا ..” بأكد على إنهن سوريين أكتر بكتير من نص السوريين اللي بعدن ما بيعرفوا من سوريا شي ” وحتى القوانين الأخيرة بتعيق حتى عملهن بالقطاع الخاص لإنو ما لازم يكونوا أكتر من نسبة معينة ضمن القطاع الخاص ..شو هالحكي اللي ما سمعنا عنو حتى بأكتر القوانين تعصباً هيدا غير المشاكل بالمدارس والجامعات وبعضهن بيعاني من مشكلة بالإقامة بسوريا من دائرة الإقامة بمكتب الهجرة والجوازات والمشكلة إنو ما في لوائح أو قوانين للقضية .

المشكلة التالتة للحقيقة مشكلة بنيوية بأزمة المواطنة بمجتمعات ما بعرف شو تصنيفا .. أزمة إلا علاقة بمفهوم الهوية الوطنية

ت كون اوضح من فترة بالأردن طلع بيان عن أحد وجوه السياسة بمحاولة لوضع تعريف للهوية الأردنية بإنو اللي كان بالأردن قبل 1910 فهو أردني وإلا فليبحث لنفسه عن هوية أخرى …

لما سمعت الخبر ما بعرف ضحكت ولا بكيت … يعني معقولة أزمة الهوية – المرتبطة بشكل جذري بالجنسية – معقول واصلة معنا لهون ..لك في بالزمانات سوري صار إمبراطور روما ..وحفيدو صار رئيس الإرجنتين يعني هيديك الدول ما كان عندا أزمة هوية لحتى سمحت لمواطن غريب ولا حتى إمو إرجنتينية يمكن بإنو يصير رئيس جمهورية ..كل القصة إنو حقق شروط الجنسية المحددة بإقامة لفترة معينة وبس ..بركز على كلمة وبس.

ومع ذلك ماني كتير واثق انو بالقريب العاجل رح يصير في إمكانية لأبناء السوريات بإنو ينالوا جنسية الأم …ف على الأقل وهيدا أوطى سقف ممكن نحكي في إنو يصير عندهن حق الإقامة الدائمة بدون مراجعة المكاتب بشكل دوري …تانياً إنو يصير معن تصريح عمل يوازيهن بالسوريين بما يتعلق بقضايا العمل والدراسة ….

لإنو حلنا بقى نخلص من قصة الجنسية مع الزمن لازم ينعطى حق الجنسية لأي إنسان أقام لفترة خمس أو ست أو عشر سنين وعنده رغبة بالحصول على الجنسية وخليهن يخدموهن علم كمان …وبعتقد كلن على استعداد لخدمة العلم مشان الحصول على الجنسية .

ديما ما سبق وحكينا شخصياً قبل …قرأت تدوينتك وما تعاطفت ولا تضامنت بل بالعكس زاد إصراري على إنو كلمة تضامن تافهة كتير ..لحنا دم واحد …وانتي وغيرك سوريين …ما تنطري حدا يقلك اياها انتي بتعرفي انك سورية …ومع ذلك رح تنعطي هالحق مع الزمن ..بأكدلك ..

Advertisements
تعليقات
  1. […]  مدونة أبو حجر […]

  2. Rafa Almasri كتب:

    و الله حلنا بقى

  3. Kenan Alqurhaly كتب:

    أنو أديه بتحس فيه حصر للمخ بمواضيع الجنسية بالبلدان العربية وبتدخل فيها مية الف حساب سياسي وطائفي وعشائري ومدري شو ومع ذلك أنو يلي مو مجنسين قاعدين وعم يتعلموا وياكلو ويشربوا ويشتغلوا ومعتبرين حالهم مواطنين مو سياح وممكن يكونوا سياح بالسجلات ماني متأكد.

    • اي ما في شي متل أزمة الهوية بهالبلدن ….لإنو ببساطة الطائفة والعشيرة وأي إنتماء قبل الدولة الوطنية ” دولة المؤسسات والقانون ” هو اهم بكتير من الإنتماء للدولة الوطنية …
      بدنا لوائج وقوانين بقى لقصة الجنسية تربط الموضوع بالإقامة لفترة معينية تربطوا بحق الأم منح الجنسية المهم تكون قوانين واضحة وناظمة لهلعملية .

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s